Monsieur le bailly de Villiers
le Chastel ou son lieutenant
Suplie hunblement Magdalegne Laurent, femme de Marin
Centier musnier demourant au moulin de Cerny,
disant que, lorsqu’elle espouza le dict Centier son
mary, elle avoict de beaux et bons meubles, or et argent , linges, habicts,
que le dict Centier a dissipée [sic] par son mauvais menage, partie
vendus par sergents pour debtes conceues par icelluy pour ces [sic] mauvais
marchez, estant promt à s’obliger et surachepter la marchandisse deulx
fois plus qu’elle ne vault et ne peult paier;
Que encore depuis il [l’] a battue et
outragée pour la faire obliger avec luy pour l’entretenement de quelques
marchez, comme de presant il en a faict ung en la ville d’Estampes où
il a prins le moulin de Chauffour à ung pris excesif et ruisneux;
que journellement il la menace de l’outrager et battre
sy elle ne s’oblige avecq luy.
Dit d’aillieurs que, pour la grand quantité
de debtes deue par son dict mary et par luy comme dict est conceue auparavent
leur mariage et depuis, les sergentz sont journellement employez à
saisir et enlever leurs meubles, où la supliante ne peult plus durer
ne supporter telle chose, ayant quatre petits enffantz soubz sa charge.
Ce consideré, Monsieur, attendu
ce que dessus, il vous plaise permettre à la supliante faire appeler
le dict Centier son mari pour veoir, dire et ordonner avecq luy qu’ils soient
separez de biens, et ferez bien et justice.
Dufresne [paraphe]
|
Un meunier vu par Oudry (1759)
|
